"LIFE 104 FM радиогийн хөтлөгч Тамара" гэхээр залуус сайн мэднэ. Түүний нэвтрүүлгээ хөтөлж байхыг анх сонсчихоод  “Энэ ямар нүүрэмгий, галзуу охин бэ. Нэвтрүүлэг хөтөлнө гэдгийг ч ёстой үзүүлж өгч байна аа” гэж боддог байлаа. Нэг мэдсэн  би өөрөө ч өнөөх цовоо сэргэлэн, танил дуу хоолойг тэсэн ядан хүлээдэг үнэнч сонсогчдынх нь нэг болчихсон байв. Уулзаж ярилцах юмсан гэж олон хоног бодсон хүсэлдээ хөтлөгдөн Америк зорихоос нь өмнө амжиж,  зочноор урьж ярилцлаа. 

-FM радиогийн хөтлөгчийн нэг өдрийн ажил хэрхэн өнгөрдөг бол?
-Миний ажлын өдөр нэг хэвийн уйтгартай байдаггүй. Өдөр бүр өөрчлөгдөнө. Өглөө сэрэхэд өөр нэг шинэ зүйл намайг хүлээж байдаг . Амьдрал, ажлаа би шинэлэг байлгахыг үргэлж хүсдэг.  Оволзсон, буцалсан  ажил маань надад үнэхээр их таалагддаг шүү.

-Ажил чинь хэдийгээр сонирхолтой ч зарим үед хэцүү санагдах үе байдаг уу?
-Байлгүй яах вэ. Миний уншиж байсан нэг сэтгүүл дээр “Хүнд ямар ч бэрхшээл тохиолдож болно. Харин түүний давуу талыг түрүүлж олж харах хэрэгтэй” гэж бичсэн байсан. Энэ үгийг мартахгүй санаж явдаг. Тиймдээ ч ямар нэг зүйл тохиолдоход учиргүй сэтгэлээр унаад байдаггүй.  Өөрийгөө стресс бухимдалд оруулахгүйн тулд хөгжилтэй, цовоо байхыг боддог. 

-Хөгжмийн нэвтрүүлэг хөтөлж байх мөч таны хамгийн жаргалтай мөч байдаг болов уу?
-Тийм ээ. Миний хувьд жаргалтай өнгөрдөг агшин бол эфирээр сонсогчидтойгоо холбогдох мөч. Тэдний сэтгэгдлийг сонсч, ганцаардаж байгаа нэгэнд нь хань болж, сэтгэлээр унаж, уйтгарлаж  суугаа нөгөөд нь дэм өгөх сайхан санагддаг.

-Сонсогчид өөртэй чинь  сэтгэлээ илэн далангүй хуваалцдаг юм шиг санагдсан.
-Намайг жаахан охин гэж голохгүйгээр манай нэвтрүүлэгт хандаад, амьдралынхаа тулгамдаж буй асуудлыг сэтгэлээ онгойтол ярилцдаг ах, эгч нар бий. Надад итгээд өөрт тохиолдсон зовлон, жаргалаа чин сэтгэлээсээ хуваалцаж байгаад нь баярладаг.